Viðmælandi þáttarins er Brynja Baldursdóttir, forstjóri Greiðslumiðlunar Íslands/Motus. Greiðslumiðlun býður upp á skráningar- og greiðslulausnir fyrir fyrirtæki, félagasamtök og opinbera aðila. Brynja er fædd árið 1976 og ólst upp í Laugardalnum í Reykjavík. Hún gekk í Menntaskólann við Hamrahlíð en þaðan lá leið hennar í Háskóla Íslands þar sem hún lauk BS prófi í Iðnaðarverkfræði og síðar MS gráðu í Aðgerðargreiningu frá Georgia Insitute of Technology. Brynja hefur m.a. unnið sem forstöðumaður sölumála hjá Símanum, samskipastjóri hjá OZ og lengst af sem forstjóri Creditinfo á Íslandi og forstjóri CreditInfo á Norðurlöndunum. En Creditinfo er fyrirtæki sem sérhæfir sig í miðlun fjárhags- og viðskiptaupplýsinga, áhættumati og fjölmiðlavöktun fyrirtækja. Brynja hefur setið í ýmsum stjórnum t.d. hjá Fossum fjárfestingabanka, Sensa, Lífsverki og Viðskiptaráði.  Þátturinn er kostaður af Icelandair.

Viðmælandi þáttarins er Sigríður Sigurðardóttir, framkvæmdastjóri hjá Experian, sem er breskt gagna- og tæknifyrirtæki staðsett í London. Sigríður er fædd árið 1968 og ólst upp í miðbænum og svo Smáíbúðarhverfinu. Hún gekk í Austurbæjarskóla, Breiðagerðisskóla, Réttó og síðan Menntaskólann við Sund. Sigríður er doktor í leiðtoga- og nýsköpunarfræðum frá The University of Manchester, er með MBA frá IESE Business School og er markaðsfræðingur frá Háskólanum í Suður Karólínu í Bandaríkjunum. Sigríður hefur búið og unnið víða erlendis og m.a. starfað sem stjórnandi hjá American Express um árabil, nýsköpunarstjóri hjá breska bankanum Santander og framkvæmdastjóri hjá Tesco, bresku smásölukeðjunni. Sigríður hefur einnig setið í ýmsum stjórnum t.d. eins og breska félaginu AutoTrader og stjórn Frumtaks, vísissjóðs.

Viðmælandi þáttarins er Kjartan Ólafsson, framkvæmdastjóri og meðstofnandi Transition Labs. Félagið starfar með leiðandi erlendum loftslagsverkefnum, og aðstoðar þau við að byggja þau upp á Íslandi. Kjartan er fæddur árið 1972 og alinn upp í Fossvoginum. Hann gekk í Réttarholtsskóla og síðan lá leið hans í Menntaskólann við Sund. Kjartan lauk BA-gráðu í heimspeki frá Háskóla Íslands og Háskólanum í Genóa á Ítalíu, og síðar MBA-prófi frá Harvard Business School. Kjartan hefur stofnað og rekið eigin nýsköpunarfyrirtæki og komið að uppbyggingu fjömargra margra sprota- og tæknifyrirtækja bæði á Íslandi og erlendis sem stjórnarmaður, fjárfestir og ráðgjafi. Meðal þeirra má nefna félögin Basno, Datamarket, GRID og Taktikal. Hann hefur starfað sem fjárfestingastjóri hjá vísisjóðnum Brunni Ventures, framkvæmdastjóri nýsköpunarfélagsins Volta, og stofnandi bandaríska tæknifyrirtækisins Basno. Áður starfaði Kjartan um árabil sem framkvæmdastjóri á viðskiptaþróunarsviði fjölmiðlasamsteypunnar Bertelsmann í New York og leiddi nýsköpunarverkefni fyrir ýmis dótturfyrirtæki hennar, svo sem Random House, SonyBMG Music og Fremantle Media. En fyrir það starfaði Kjartan sem markaðsstjóri bókaforlagsins Vaka-Helgafell, og framkvæmdastjóri Markaðs- og þróunarmála hjá Eddu útgáfu. Utan viðskiptalífsins hefur Kjartan setið í stjórnum fjölmargra samtaka og stofnanna t.d. eins og UNICEF á Íslandi og Hörpu, tónlistarhúss. Þessi þáttur er í boði Icelandair.

Viðmælandi þáttarins er Hermann Haraldsson, meðstofnandi og forstjóri Boozt.com. Boozt.com er stærsta netverslun Norðurlandanna sem selur vörur eins og tískufatnað, íþróttaföt, snyrtivörur og heimilisbúnað. Hermann er fæddur árið 1966 og ólst upp í Reykjavík og á Akureyri. Hann flutti 14 ára til Danmerkur í heimavistaskóla, gekk í menntaskóla þar og háskóla og hefur búið í Danmörku síðan. Hermann kláraði B.Sc. próf í viðskiptahagfræði frá Viðskiptaháskólanum í Kaupmannahöfn (CBS) og Master í viðskiptahagfræði frá sama skóla. Hermann hefur unnið sem framkvæmdastjóri OMD Nordic, birtingahúss, sem eigandi og framkvæmdastjóri Win Win auglýsingastofunnar og framkvæmdastjóri Brøndby IF, danska fótboltaklúbbsins sem listaður er í kauphöll. Hermann stofnaði síðan Boozt.com árið 2010 og veltir fyrirtækið nú um 6,5 milljarða sænskra króna eða um 85 milljarða íslenskra króna. Höfðustöðvar Boozt.com eru í Malmö og starfa um 1400 starfsmenn hjá fyrirtækinu í Kaupmannahöfn, Árásum, Vilnius og í Póllandi. Hermann hefur einnig setið í ýmsum stjórnum m.a. hjá Adform, sjónvarpsstöðinni TV 2 og fótboltaliðinu Brøndby. Þátturinn er kostaður af Icelandair.

Viðmælandi þáttarins er Guðjón Már Guðjónsson eða Guðjón í OZ eins og hann er alltaf kallaður en hann er stofnandi og framkvæmdastjóri OZ. Guðjón er fæddur árið 1972 og ólst upp í Sundahverfinu. Hann gekk í Langholtsskóla og síðan Verzlunarskólann og stofnaði þar hugbúnaðarfyrirtækið OZ, sem þróaði þrívíddarhugbúnað og síðar samskiptahugbúnað. Það fyrirtæki var selt til Nokia árið 2008 fyrir um $300 milljónir bandaríkjadala. Guðjón hefur síðar komið að stofnun margra fyrirtækja þ.a.m. Íslandssíma sem síðar varð Vodafone, Nova, Industria, Maskína, Agora en nú einbeitir hann sér að öðru fyrirtæki sem ber líka heitið OZ og þróar vöruna OZ Sports, sem er tæknilausn til að taka upp íþróttatburði, klippa og miðla og OZ.com, sem er tæknilausn sem gerir áhorfendum kleift að taka þátt í gagnvirkum viðburðum á netinu. Þátturinn er kostaður af Icelandair.

Viðmælandi þáttarins er Bjarney Sonja Breidert eða Baddý eins og hún er alltaf kölluð. Baddý er stofnandi og framkvæmdastjóri 1xINTERNET, sem er hugbúnaðarfyrirtæki stofnað árið 2013. Um 70 starfsmenn starfa hjá 1xINTERNET og er fyrirtækið með skrifstofur í Frankfurt, Berlin, Reykjavík og á Conil de La Frontera á Spáni. Baddý er fædd árið 1980 og alin upp í Fossvoginum í Reykjavík. Hún gekk í Verslunarskólann, lauk tölvunarfræðiprófi frá Háskólanum í Reykjavík og síðar mastersgráðu í verkfræði frá Tækniháskólanum í Vínarborg. Baddý byrjaði að starfa sem forritari en vann svo sem ráðgjafi hjá Thule Investments, fjárfestingasjóði, áður en hún stofnaði 1xINTERNET. Baddý er formaður stjórnar alþjóðlegu Drupal samtakanna, sem eru samtök sem standa á bak við opna hugbúnaðinn Drupal sem er leiðandi vefkerfi hjá mörgum af stærstu fyrirtækjum í heimi. Þessi þáttur er kostaður af Icelandair.

Viðmælandi þáttarins er Hekla Arnardóttir. Hún er meðstofnandi Crowberry Capital, sem er vísissjóður sem fjárfestir í norrænum tækni sprotafyrirtækjum á fyrstu stigum fjármögnunar. Hekla er fædd árið 1974 og alinn upp í Fossvoginum í Reykjavík. Hún gekk í Verzlunarskólann og síðan lá leið hennar í véla- og iðnaðarverkfræði í Háskóla Íslands þar sem hún lauk verkfræðiprófi. Hekla vann sem prófunarstjóri hjá Össuri, stoðtækjaframleiðanda og síðar sem vörustjóri hjá Össuri í Kína. Árið 2010 hóf Hekla störf sem fjárfestingastjóri hjá Nýsköpunarsjóði atvinnulífsins, sem er vísissjóður í eigu íslenska ríkisins og starfaði þar í um 7 ár. Árið 2017, stofnaði Hekla vísissjóðinn Crowberry Capital ásamt meðstofnendum sínum, Helgu Valfells og Jenný Ruth Hrafnsdóttur. Síðan þá hefur Crowberry Capital, safnað í tvo fjárfestingasjóði, Crowberry I sem er fjórir milljarðar að stærð og Crowberry II sem er ellefu milljarða að stærð. Crowberry I hefur fjárfest í 16 fyrirtækjum og nýi sjóðurinn, Crowberry II hyggst fjárfesta í allt að 30 fyrirtækjum á næstu árum.  Þessi þáttur er í boði Icelandair.

Viðmælandi þáttarins er Hermann Kristjánsson, stofnandi og fyrrum framkvæmdastjóri Vaka, sem er 30 ára gamalt hátæknifyrirtæki sem býr til búnað fyrir fiskeldi. Hermann er fæddur árið 1962 og ólst upp í Kópavogi og Garðabæ. Hann gekk í Fjölbrautaskólann í Garðabæ og Flensborg og síðan lá leið hans í Háskóla Íslands í rafmagnsverkfræði. Hermann stofnaði Vaka árið 1986 þegar hann var enn í háskólanámi með það að markmiði að tæknivæða fiskeldi. Fyrirtækið starfaði í 30 ár og bjó til 40 mismunandi vörur, m.a. til að telja, stærðarmæla, dæla og flokka lifandi fiska í fiskeldi og laxveiðiám. Fyrirtækið velti tæplega 2 milljörðum króna á ári undir lokin og var með dótturfélög í Noregi, Skotlandi, Chile og Kanada. Árið 2016 var Vaki selt til bandaríska fyrirtækisins, Pentair Aquatic Systems og starfaði Hermann þar í tvö ár þangað til það var síðan selt áfram til fyrirtækisins, Merck, þar sem Hermann starfaði sem ráðgjafi þar til hann sagði skilið við við fyrirtækið eftir 32 ár. Í dag situr Hermann í stjórnum ýmissa nýsköpunarfyrirtækja og sinnir hestamennsku af miklu kappi þess í milli. Þátturinn er kostaður af Icelandair.

Viðmælandi þáttarins er Gunnar Hólmsteinn Guðmundsson, framkvæmdastjóri og meðstofnendi hugbúnaðarfyrirtækisins Quest Portal. Gunnar er fæddur árið 1986 og ólst upp á Seltjarnarnesinu. Hann gekk í Menntaskólann í Reykjavík en þaðan lá leið hans í verkfræði við Háskóla Íslands þar sem hann stofnaði fyrirtækið CLARA sem hjálpaði fyrirtækjum að skilja umræðu á netinu. Gunnar vann að fyrirtækinu í 5 ár og seldi það til bandaríska tæknifyrirtækisins Jive Software, árið 2013, þar sem hann vann síðan í eitt ár sem forstöðumaður greiningardeildar. Árið 2013 gekk Gunnar til liðs við íslenska leikjafyrirtækið Plain Vanilla, sem gerði spurningaleikinn Quizup, og vann sem rekstrarstjóri fyrirtækisins þangað til Quizup var selt til GluMobile árið 2016. Með alla reynsluna í fartaskinu, fór sama teymi aftur á stað árið 2017, og stofnaði fyrirtækið TeaTime Games sem bjó til farsímaleiki sem nýttu nýja tækni sem þeir þróuðu til að gera leiki persónulegri með myndbandsspjalli. Eins og sönnum raðfrumkvöðli sæmir er Gunnar kominn á stað með nýtt sprotafyrirtæki, sem heitir QuestPortal, sem hjálpar fólki að spila spunaspil á netinu og hafa þau safnað um 2,6 milljónum bandaríkjadala frá innlendum og erlendum fjárfestum. Þessi þáttur er í boði Icelandair.

Viðmælandi þáttarins er Ragnhildur Geirsdóttir, forstjóri Reiknistofu bankanna eða RB. RB er fyrirtæki í eign Seðlabankans og íslensku bankanna sem vinnur að innviðum íslensks fjármálakerfis. Ragnhildur er fædd árið 1971 og ólst upp á Hlíðunum. Hún gekk í Menntaskólann í Hamrahlíð en þaðan lá leið hennar í Háskóla Íslands þar sem hún lauk prófi í véla- og iðnaðarverkfræði. Ragnhildur lauk síðan MS gráðu í iðnaðarverkfræði frá Háskólanum í Wisconsin og MS prófi í viðskiptafræði frá sama skóla árið 1998. Eftir útskrift hóf Ragnhildur störf hjá Fjárfestingabanka Atvinnulífsins og síðan Flugleiðum/Icelandair þar sem hún tók síðar við sem framkvæmdastjóri rekstrastýringar Icelandair og síðar sem forstjóri FL Group. Eftir að Ragnhildur sagði starfi sínu lausu hjá FL Group, tók hún við sem forstjóri Promens, sem var alþjóðlegt plastfyrirtæki sem velti um 20 ma. kr. með um 6000 starfsmenn þegar best lét. Ragnhildur vann síðar sem framkvæmdastjóri rekstrar- og upplýsingasviðs hjá Landsbankanum og stutt sem aðstoðarforstjóri hjá Wow Air flugfélagi þangað til hún tók við forstjórastólnum hjá RB. Þátturinn er kostaður af Icelandair.

Viðmælandi þáttarins er Gunnar Páll Tryggvason. Hann er stofnandi og framkvæmdastjóri Alfa Framtaks. Gunnar er fæddur árið 1977 og alinn upp í Norðurmýrinni, Reykjavík. Hann gekk í Menntaskólann í Hamrahlíð og síðan lá leið hans í Háskóla Íslands þar sem útskrifaðist sem viðskiptafræðingur og síðar lauk hann MBA námi frá Wharton Business School í Bandaríkjunum. Gunnar starfaði lengi í fyrirtækjaráðgjöf Kaupþings á Íslandi og í Bretlandi og svo sem fjárfestingastjóri í framtakssjóð Kaupþing Singer & Friedlander. Árið 2009 stofnaði Gunnar Icora Partners sem starfaði á sviði fyrirtækjaráðgjafar og endurskipulagningar fyrirtækja og lauk fjölda verkefna víðsvegar um Evrópu. Árið 2018 stofnaði Gunnar Páll síðan rekstrarfélagið Alfa Framtak sem safnaði í 7 milljarða kr. framtakssjóð sem hefur verið fjárfest í stöndugum íslenskum rekstarfyrirtækjum, oftast sem meirihlutaeigandi. Nú nýverið, árið 2022, safnaði Alfa Framtak í annan framtakssjóð sem er 15 milljarða kr. sem fjárfestir í stöndugum rekstrarfyrirtækjum, fjölskyldufyrirtækjum í kynslóðaskiptum eða vaxtarfyrirtækjum. Í þættinum ræðir Gunnar m.a. um rekstur framtakssjóða, mótandi áhrif fjármálahrunsins 2008, helstu lexíur á ferlinum og deilir ýmsum skemmtilegum sögum. Þessi þáttur er í boði Icelandair.

Viðmælandi þáttarins er Grímur Lund en hann er stofnandi danska tæknifyrirtækisins Logimatic og sat seinna í framkvæmdastjórn hjá breska tæknifyrirtækinu AVEVA. Grímur er fæddur árið 1961 og er alinn upp á Melrakkasléttunni. Hann gekk í Tækniskólann og þaðan lá leið hans til Danmerkur þar sem hann lauk mastersnámi í rafmagnsfræði við Álaborgarháskóla og hefur hann búið í Danmörku síðan. Árið 1987 stofnaði Grímur ásamt meðstofnanda sínum, Logimatic sem er ráðgjafar- og hugbúnaðarfyrirtæki. Ein af aðallausnum fyrirtækisins var vörustýringarkerfi fyrir skipasmíðastöðvar. Grímur starfaði sem forstjóri Logimatic þangað til hugbúnaðarkerfið var selt til breska fyrirtækisins AVEVA árið 2010. Grímur fylgdi í kjölfarið með og var í framkvæmdastjórn AVEVA sem er eitt stærsta tæknifyrirtæki á sviði hugbúnaðar i Bretlandi og skráð í kauphöllina í London. Grímur vann í tólf ár hjá AVEVA þar af síðustu ár, sem framkvæmdastjóri ráðgjafasviðs með 1100 starfsmenn og velti sviðið um 20 milljarða króna. Grímur hefur nú nýlega sagt starfi sínu lausu og vinnur nú með sprotafyrirtækjum á vaxtarstigi og situr í stjórnum nokkurra fyrirtækja. Grímur hefur alla tíð haldið mikilli rækt við Ísland og dvelur jafnan á sínum bernsku slóðum, þar sem hann á jörð og hús. Þessi þáttur er í boði Icelandair.

Viðmælandi þessa þáttar er Svava Johansen eða Svava í Sautján, eins og hún er alltaf kölluð. Hún er eigandi og forstjóri NTC, sem framleiðir og selur tískufatnað á Íslandi. NTC starfrækir nú 15 verslanir á höfuðborgarsvæðinu, vefverslun, saumastofu og eigin fataframleiðslu erlendis og heildsölu sem selur fatnað til margra af betri tískuvöruverslunum á landsbyggðinni. En Svava er fædd árið 1964 og er alin upp í Safamýri og Laugarásnum. Hún gekk í Verslunarskólann og byrjaði að vinna í Sautján versluninni meðan hún var enn í námi. Svava hefur unnið í Sautján eða NTC í rúmlega 40 ár og gengt þar ýmsum störfum en tók síðan við forstjórastarfinu árið 2005 þegar hún keypti fyrirtækið og hefur fyrirtækið vaxið vel og dafnað undir hennar stjórn. Þessi þáttur er í boði VÍS og Kaffitár.

Viðmælandi þessa þáttar er Ari Fenger, forstjóri 1912 og formaður Viðskiptaráðs. 1912 er aldargömul heildsala og fjölskyldufyrirtæki, sem þá hét Nathan & Olsen og var stofnað árið 1912. Fyrirtækið er eitt af stærstu fyrirækjum landsins í heildsölu með dagvöru og veltir um 11 milljörðum íslenskra króna. 1912 er móðurfélag Nathan & Olsen, sem sinnir heildsölu á sviði snyrti- og dagvöru, Ekrunnar sem selur aðföng til stóreldhúsa og matvælaiðnaðarins og Emmessís, ísgerðarinnar. En Ari er fæddur árið 1980 og er alinn upp í nesinu. Hann gekk í Verslunarskóla Íslands og byrjaði síðan að vinna sem vörumerkjastjóri hjá Nathan & Olsen og síðan sem forstjóri fyrirtækisins þangað til hann tók við sem forstjóri rekstrarfyrirtækisins, 1912. Ari er einnig formaður Viðskiptaráðs og er jafnframt stór hluthafi í Stoðum, einu stærsta fjárfestingafélagi landsins. Þátturinn er kostaður af VÍS og Kaffitár.

Viðmælandi þessa þáttar er Bjarney Harðardóttir, meðeigandi og stjórnandi hjá 66°Norður. Fyrirtækið er eitt elsta framleiðslufyrirtæki landsins og var stofnað árið 1926 og framleiðir og selur útivistafatnað. Verslanir 66°Norður eru nú um tólf talsins, þar af tvær í Danmörku. Sjóklæðagerðin rekur einnig verslunina Rammagerðina, sem selur ýmsar hönnunar- og gjafavörur. Bjarney er fædd árið 1969 og er alin upp í Kópavoginum og Akranesinu. Hún gekk í Menntaskólann í Hamrahlíð en síðan lá leið hennar í viðskiptafræði í Tækniháskólann sem er nú Háskólinn í Reykjavík þar sem hún lauk einnig MBA gráðu. Bjarney hefur komið víða við og vann m.a. hjá Póstinum, Sölusambandi íslenskra fiskframleiðanda og sem framkvæmdastjóri markaðssviðs Íslandsbanka og kennari við Háskólann í Reykjavík. En árið 2011, keypti hún ásamt manninum sínum Helga Rúnari Óskarssyni, 66°Norður, sem hefur vaxið vel undir þeirra stjórn. Árið 2018 fjárfesti bandaríski framtakssjóðurinn, Mousse Partners, í 66°Norður fyrir um 4 milljarða íslenskra króna til að styrkja áframhaldandi vöxt vörumerkisins á erlendri grundu. Þátturinn er kostaður af VÍS og Kaffitár.

Viðmælandi þessa þáttar er Magnús Ingi Óskarsson, stofnandi Calidris, hugbúnaðarfyrirtækis. Calidris er hugbúnaður sem hjálpar flugfélögum að auka sveigjanleika og tekjur og sum of stærstu flugfélögum í heiminum nota ennþá hugbúnaðinn í dag. Calidris var selt til bandaríska fyrirtækisins Sabre árið 2010 en Sabre er eitt af stærstu hugbúnaðarfyrirtækjum heims á flugrekstrarsviði. En Magnús Ingi er að eigin sögn, sveitastrákur úr Skagafirðinum fæddur árið 1960. Hann gekk í Menntaskólann á Akureyri og síðan lauk hann B.S. í tölvunarfræði frá Háskóla Íslands og síðan mastersnámi í tölvunarfræði við Illinois Institute of Technology í Chicago og síðar MBA námi frá IMD í Sviss. Magnús vann í fimm ár hjá Icelandair við tekjustýringu og í stutta stund starfaði hann sem framkvæmdastjóri hjá OZ, hugbúnaðarfyrirtæki. Í dag er Magnús Ingi í ráðgjafaráði Eyris Ventures og vinnur einnig með ýmsum sprotafyrirtækjum. Þátturinn er kostaður af VÍS og Kaffitár.

Viðmælandi þáttarins er Kolbrún Jónsdóttir, framkvæmdastjóri fjármálasviðs Íslandshótela. Íslandshótel rekur 17 hótel með yfir 1.700 gistirými út um allt land auk funda- og ráðstefnuaðstöðu. Kolbrún tók við starfinu árið 2016 en þekkti vel til fyrirtækisins enda setið í stjórn hótelsins áður. Kolbrún er fædd árið 1962 og er alin upp í Kópavogi. Hún gekk í MH og kláraði svo Cand Ocean gráðu í viðskiptafræði frá Háskóla Íslands og lauk síðar Excecutive Education frá Kenan-Flagler Business School og síðan löggildingu í verðbréfamiðlun. Kolbrún hefur m.a. starfað sem fjármálastjóri Húsasmiðjunnar, útibússtjóri og forstöðumaður bakvinnslu í Íslandsbanka, framkvæmdastjóri hjá VÍS og sem framkvæmdastjóri Kjölfestu, framtakssjóðs. Kolbrún hefur setið í hinum ýmsu stjórnum fyrirtækja t.d. eins og hjá Íslandsbanka, Fastus, Húsasmiðjunni, Senu og verið formaður endurskoðunarnefndar hjá Sameinaða lífeyrissjóðnum. Þátturinn er kostaður af VÍS og Kaffitár.

Viðmælandi þessa þáttar er Hafdís Jónsdóttir, eða Dísa í World Class, eins og hún er alltaf kölluð. Hún er framkvæmdastjóri og einn af eigendum World Class, heilsuræktarstöðvanna, sem allir Íslendingar þekkja. Hafdís er fædd árið 1961 og alin upp í Garðabænum. Eftir grunnskóla fór hún í danskennaranám hjá Dansskóla Sigvalda og útskrifast sem danskennari frá Danskennarasambandi Íslands. Síðar lauk hún frekara dansnámi í Florida School of the Arts og í New York. Eftir að hún kom heim frá námi stofnaði hún Dansskóla Dísu sem rann að hluta til inn í World Class sem hún og maðurinn hennar Björn Leifsson, byggðu upp. World Class var stofnað árið 1985 og rekur nú um 18 líkamsræktarstöðvar, ásamt snyrti- og nuddstofu, spa og matsölustöðum. Dísa starfaði einnig sem formaður stjórnar FKA, Félagi kvenna í atvinnulífinu, eftir að hafa setið í stjórn félagsins í nokkur ár. Þátturinn er kostaður af VÍS og Kaffitár.

Viðmælandi þessa þáttar er Gísli Herjólfsson, stofnandi og forstjóri Controlant. Controlant er fyrirtæki sem framleiðir hug- og vélbúnað sem mælir meðal annars raka, hitastig og staðsetningu og sendir frá sér rauntímaupplýsingar svo hægt sé að fylgjast með og tryggja gæði á viðkvæmum vörum, m.a. á lyfja- og matvælamarkaði. Controlant hefur verið mikið í umræðunni nýverið þar sem fyrirtækið kemur meðal annars að dreifingu Phizer bóluefnisins. Gísli Herjólfsson er fæddur árið 1979 og ólst upp í Garðabænum og Kópavoginum. Hann gekk í Menntaskólann í Reykjavík og síðan lauk hann B.S. og mastersgráðu í rafmagnsverkfræði frá Háskóla Íslands. Árið 2007 stofnaði hann ásamt félögum sínum fyrirtækið Controlant og hefur starfað sem forstjóri fyrirtækisins síðustu fjórtán árin. Nú er fyrirtækið komið á flug út af Covid heimsfaraldinum og hefur vaxið gífurlega á síðustu þremur árum. Fyrirtækið hefur safnað um þremur milljörðum króna frá fjárfestum, þar af um tvo milljarða aðeins á síðustu tveimur árum. Starfsmannafjöldi fyrirtækisins er nú um 320 og er áætlað að tekjur verði um 15 milljarðar á árinu 2022. Þátturinn er kostaður af VÍS og Kaffitár.

Viðmælandi þessa þáttar er Ágúst Einarsson, sem starfar nú sem ráðgjafi en er fyrrum framkvæmdasjóri Tempo, sem er tímastjórnunarkerfi, sem byrjaði sem nýsköpunarvara hjá TM Software og svo Origo. Ágúst er fæddur árið 1962 og ólst upp í Mosfellsveit. Hann gekk í Vélskólann og Tækniskólann en þaðan lá leið hans í BS nám í vélaverkfræði við Háskólann í Álaborg þar sem hann kláraði einnig MS gráðu í iðnaðarverkfræði. Ágúst starfaði meðal annars sem framkvæmdastjóri upplýsingatæknifyrirtækjanna Trackwell og Skyggnir og síðan sem framkvæmdastjóri TM Software sem rann inn í Origo þar sem Tempo varð síðan til. Ágúst starfaði síðan sem framkvæmdastjóri Tempo í 11 ár þangað til árið 2017 þegar fyrirtækið var selt að hluta til Diversis Captial árið 2017. Ágúst starfar núna sem ráðgjafi hjá fyrirtækjum á vaxtastigi og situr einnig í stjórnum nokkurra fyrirtækja. Þátturinn er kostaður af VÍS og Kaffitár.